ஸ்ரீராம நவமி - 27.03.2007.

ராம நவமியும் ராம நாம மகிமையும்!

திருமாலின் தசாவதாரங்களில் ஏழாவது அவதாரம் ராம அவதாரம். ஸ்ரீராமர் அவதரித்ததும் ஏழாவது நட்சத்திரமாகிய புனர்பூச நட்சத்திரத்தில். புனர்பூச நட்சத்திரம் உச்சத்திலிருக்கும் சுக்கில பட்ச திதியான ஒன்பதாம் நாளில், நவமி திதியில் ராமபிரான் அவதரித்த தினமே ஸ்ரீராம நவமியாகக் கொண்டாடப்படுகிறது.

ஏழு என்ற எண்ணின் அடிப்படையில் பார்த்தால், வாரத்துக்கு நாட்கள் ஏழு. சூரியன் பவனி வரும் தேரின் குதிரைகள் ஏழு. சப்த ரிஷிகள், சப்த ஸ்வரங்கள் என்கிற விதத்தில் ஏழாவது அவதாரமாகிய ஸ்ரீராம அவதாரமும் விசேஷம் வாய்ந்தது.

சுக்ல ப்ரதமை முதல் நவமி வரையில் ஒன்பது நாளும் ஸ்ரீராமருக்கு துளசி மாலை அணிவித்து, ஸ்ரீராமாயணம் பாராயணம் செய்து ராம பூஜை செய்வது சிறப்பு. அவ்விதம் பூஜை செய்ய முடியாதவர்கள் ஸ்ரீராம நாம ஜபம் செய்து வந்தாலே போதுமானது.

ஸ்ரீராம நவமியன்று விரதம் இருந்து வழிபடுபவர்களுக்கு, 'சொல்லின் செல்வன்' அனுமனின் அருள் கிட்டும் என்பது ஐதீகம். அன்று எலுமிச்சை, புளி, வெல்லம் கொண்டு தயாரிக்கும் பானகமும், மோரில் தயாரித்த பானகமும் நிவேதனம் செய்வார்கள்.

சில கிராமத் திருக்கோயில்களில் நீர் மோர் பானகத்துடன், ஊறவைத்த வடை, பருப்பில் வெள்ளரிப் பிஞ்சுகளை நறுக்கிப் போட்டு வரும் பக்தர்களுக்குப் பிரசாதமாக அளிப்பார்கள். ஸ்ரீராமர் அவதரித்தது கோடைக் காலத்தில். எனவே, கோடை உஷ்ணத்தைத் தணிக்கும் வகையில் பக்தர்களுக்கு இந்தப் பிரசாதங்களுடன், சில இடங்களில் விசிறியும் தருவார்கள். பண்டிகைக் காலங்களிலாகட்டும் அல்லது மற்ற சாதாரண நாட்களிலாகட்டும். வாழ்க்கையின் தாத்பர்யமே பிறர் துயரங்களைக் குறிப்பறிந்து தீர்ப்பதில்தான் இருக்கிறது என்பது இதிலிருந்து தெரிகிறது.

ராம மந்திரத்தின் ஸ்தூல வடிவினராக வந்தவர் ஸ்ரீராமர். 'ராம' என்னும் மந்திரத்தை இடைவிடாது உச்சரித்து வந்ததினால்தான், ரத்னாகரன் என்ற வேடன் வால்மீகி மஹரிஷியாகப் பரிபக்குவமடைந்தார். இதை வால்மீகி முனிவரே,

'ராமா த்வன் நாம மஹிமா வர்ண்யதே கேன வா கதம்
யத் ப்ரபாவாதஹம் ராம் ப்ரம்ம ரிஷித்வமவாப்தவான்'


ராமா - ஏதொன்றினுடைய ஆற்றலால் யான் பிரும்ம ரிஷி நிலையை அடைந்தேனோ அத்தகைய உன் பெயரின் பெருமையை யாரால் விளக்க இயலும்? என்று கேட்கிறார்.

'ராம நாமம் பஜரே மானஸ' - ராமனின் பெயரையே நினைத்திரு மனமே! என்று தியாகப் பிரும்மமும் ராம நாமத்தின் சிறப்பை எடுத்துரைக்கிறார்.

'ராம' என்ற வார்த்தைக்கு ஆனந்தம் என்று பொருள். ராம என்ற சப்தத்துக்கு ஆனந்தத்தைத் தருபவன் என்று பொருள். 'ஓம் நமோ நாராயணாய' என்பது அஷ்டாட்சரம். 'நமசிவாய' என்பது பஞ்சாட்சரம். இவையிரண்டிலும் அமைந்துள்ள வாக்கியங்களில் முறையே 'ரா', 'ம' என்ற இரண்டு அட்சரங்களைப் பெற்றால் 'ராம' என்ற மூலமந்திரம் கிடைக்கும். இவையிரண்டுமே இந்த அஷ்டாட்சரம், பஞ்சாட்சரம் என்ற மந்திரங்களுக்கும் உயிர்நாடி போலும் அமைந்துள்ளன.

ராம நாமத்தின் சிறப்பே ராமாயணம். ஆஞ்சநேயருக்கு உயிராய் இருப்பது 'ராம' நாமமே. எல்லாவித பயங்களையும் போக்கடித்து, சகல ஞானத்தையும் பக்தியையும் அளித்து, இகபர சுகங்களையும் தரவல்லது 'ஸ்ரீராம நாமம்'.

ஸ்ரீ ஆஞ்சநேயரின் அபரா அவதாரமாக மஹாராஷ்டிரத்தில் தோன்றிய மஹான் 'ஸ்ரீ சமர்த்த ராமதாஸ் சுவாமிகள்' மாருதியைப் ப்ரத்யட்சமாகக் கண்டு, அவர் மூலமாக சாட்சாத் ஸ்ரீராமச்சந்திர மூர்த்தியின் தரிசனத்தைப் பெற்று 'த்ரயோதசாக்ஷரி'யான 'ஸ்ரீராம் ஜய ராம் ஜய ஜய ராம்' என்ற மஹா மந்த்ரத்தை உபதேசித்து பூமியெல்லாம் தழைக்கச் செய்தார்.

காசி க்ஷேத்திரத்தில் மரிக்கும் ஜீவன்கள் - விலங்கானாலும், மனிதர்களானாலும் இடப்பக்கம் திரும்பியே ஜீவனை விடும் என்றும், அவ்வாறு உயிர் பிரியும் சமயத்தில் ஸ்ரீபரமேஸ்வரன் ஜீவனது வலது காதில், தாரக நாமமான 'ராம ராம ராம' என்ற நாமத்தை உபதேசித்து முக்தி அளிப்பதாக ஐதீகம்.

ராம நாமாவை ஜபிக்கும் முறை!

'ஓம்' என்று சற்று நிறுத்தி, பின்பு 'ஸ்ரீராம ஜய ராம ஜய ஜய ராம' என்று நிதானமாக பயபக்தியுடன் ஜபியுங்கள். ஜபிக்கும்போது ஸ்ரீராமனே உங்கள் எதிரில் இருப்பதாகப் பாவித்துக்கொண்டு எண்ணிக்கை நூற்றெட்டுக்குக் குறையாமல் ஜபியுங்கள். முடிந்தால் 21,600 வரை தினமுமே ஜபிக்கலாம். ஆரம்பத்தில் குறைந்தபட்சம் அரை மணி நேரம் எவ்விதச் சிந்தனையும் இல்லாது நிதானமாக தினமும் ஜபியுங்கள்.

ஓர் ஆண்டுவரை ஜபத்தை - கண்டத்தில் செய்யுங்கள். இருதயத்தில் ஓர் ஆண்டு செய்யுங்கள். நாபியில் ஓர் ஆண்டு செய்யுங்கள். நாளடைவில் ஒவ்வொரு ரோமத் துவாரமும் 'ராம' நாமத்தைத் தானாகவே சொல்லும். உங்கள் உடம்பு முழுமையும் மந்திரத்தின் சக்தியால் நிறைந்துவிடும். நீங்கள் எப்பொழுதும் தெய்வப் பிரேமையில் இருப்பீர்கள். நீங்கள் 'ராம' மந்திரத்தை 13 கோடி முறை பக்தி சிரத்தையுடன் ஜபித்தால், அவரது தரிசனமும் கிட்டும்.

நீங்கள் விடாமுயற்சியுடன் இதைத் தொடர்ந்து செய்தால் நான்கு வருடங்களில் செய்து முடிக்கலாம். இது உண்மை. மூன்று விஷயங்கள் உலகத்தில் அருமையானவை. அவை - மனிதப் பிறவி, மோட்ச விருப்பம், சத்குருவின் கிருபை. நற்குணமுள்ள நல்ல ஆத்மாவுக்குத்தான் குரு கடாட்சம் கிடைக்கும். ராம நாமாவினால் பலன் ஏற்பட வேண்டுமானால், உங்களுக்கு நம்பிக்கை அவசியம் இருக்க வேண்டும். ராமநாமாவை உச்சரிப்பதனால் ஏற்படும் சலனமானது, மனத்தை - ராஜஸ, தாமச குணங்களிலிருந்து சத்வ குணத்துக்கு மாற்றுகிறது.

வியாதியைக் குணப்படுத்தும் மருந்தைப்போல், காந்திஜி அவர்கள் புண்ணிய நாமாவால் வியாதியைக் குணப்படுத்தும் முறைக்கு 'நாமாபதி' அல்லது 'நாம தெரப்பி' என்று கூறினார். அவரது மகன் மணிலால் ஒருமுறை டைபாய்ட் காய்ச்சலால் அவதிப்பட்டபோது, காந்திஜி அவர்கள் ஓர் ஈரத்துணியை எடுத்து அதிக உஷ்ணத்தைத் தவிர்ப்பதற்காக மணிலாலின் முன்நெற்றியில் வைத்து 'ஸ்ரீராம' நாமத்தை மிக ஆழ்ந்த பக்தியுடன் ஜபித்துக் குணமாக்கினார்.

'சுபஸ்ய சீக்கிரம்' என்ற பழமொழிப்படி நன்றே செய்யவும். நன்றும் இன்றே செய்யவும். நாளை என்பது எமனுடைய நாள். மனம் ஒவ்வொரு நிமிடமும் மாறும் தன்மையுள்ளது. நல்ல கருமத்தை உடனே செய்யவும். நமது உள்ளத்தில் ஒரு சுயநலச் சிந்தனையோ அசுத்தமோ இவை எது இருந்தாலும், அவைகளைக் களைந்தெறிந்து ஸ்ரீராமரைத் தியானம் செய்வோம்!